مجرودة بعنوان ( أسمع )

مجرودة بعنوان ( أسمع )

أسمع بلي وراه جرينا

ما حاجة منه طقينا

غير نظرة بانت من عينه

خلتني في حال حزين

*** *** ***

خلتني في حال ذوايح

هاللي نا في زوله صايخ

وقليبي في جرته رايح

نا بروحي موش عارف وين

*** **** ****

نا بروحي ياناس حبيته

وياما من مشوار مشيته

ورا الغالي نين يوصل بيته

لكن ما كلمني الزين

*** *** ***

لكن ما كلمني ف يوم

هاللي نا فحبه مظلوم

وحبي له أيدوم أيدوم

حتى لو يطول اسنين

*** *** ***

حتى لو يطول ياناس

له عندي ديما أخلاص

ونهديله عقد الألماس

ونفديه أبروحي والعين

*** *** ***

نفديه بروحي نا الغالي

هاللي شكله ما ريت والي

لا توا لا أيام ظلالي

واللي شاف ايقولي وين

*** *** **

واللي شاف ايقول الليله

يحكي ويصبي على حيله

نا ريدي ما فيش مثيله

قهره فيكم يا حاسدين

*** *** ***

قهره فيكم يا حساده

نا ريدي ما فيش انداده

مسع جاباته ولاده

فايز عن جيله بجيلين

[ندعوك للتسجيل في المنتدى أو التعريف بنفسك لمعاينة هذه الصورة]