خرافة ((شي بن شي))

------------------
هداكا عمك شى بن شى كان ماش يدب علي حاله لاقى الصيادة قال لهم ...ا ن شاء الله ما تحصلوا شئ ...عطوه طريحة امقومه نباشة القبور ,قاللهم أمالا يا سيادى شنو نقول ,قالوا له قول ستة وسبعة في النهار شوي ...سيبهم ومشي يدب علي حاله..
فات على جماعه قايمين ميت علي كتافهم قال لهم...ا ن شاء الله ستة وسبعة في النهار شوي...عطوه طريحة,باهيه قالهم امالا شنو نقول ,قالوا له قول عظم الله أجركم في الميت اللي عندكم ...........
مشي علي حاله لاقى اجميعه دايرين عرس وناقلين عروس في جحفه قالهم...الله يعظم أجركم في الميت اللي عندكم...عطوه طريحة باهيه شوي ,قال لهم أمالا يا سيادى شنو نقول ,قالواله قول مبروكة سعيده على أماليها....
فات على جماعه عندهم كلبة واكلتلهم ولدهم قال لهم... مبروكة سعيده على أماليها...عطوه طريحة,قالهم يا سيادى قولو لي شنوا نقول,قالوا له قول تنبح وتلالي في الديار الخوالي ...
القي واحد شاري بقرة وفرحان بيها وخاش بيها على عويلته ويصبوا لها في الحليب على وجهها...قاله ان شاء الله تنبح وتلالي في الديار الخوالي...عطاه طريحة امقومه ,
قاله يا سيدي أمال شنو نقول,قاله قول زبادة لبادة على شواربه وشوارب أولاده ...
خطم على اجميعه يطلعوا في حاشاكم مجاري متع بيت راحة.قال لهم زبادة لبادة على شواربه وشوارب أولاده...عطوه طريحة,قال لهم أمالا يا سيادى شنو نقول ,قالوا له قول يبيس ويشيح وتقلة الريح...
ألقى وحدين فرحانين يغرسوا في جنان كيف بادين فيه ...قال لهم أن شاء الله يبيس ويشيح وتقلة الريح...عطوه طريحة,قال لهم أمالا يا سيادى شنو نقول ,قالوا له قول قول يكبر ويقصل ويبدي كيف العنصل...
خطم على ولد السلطان ضارباته شوكه...قاله يكبر ويقصل ويبدي كيف العنصل..عطوه طريحة وجوه بيقتلوه,هرب منهم لقي حراث يحرث.في الوطا..قاله راهم جوك بيقتلوك ياحراث....
الحراث هرب وهو شد الجمل وقعد يحرث ,وهما مشوا في جرة الحراث قتلوه,
وهو سلم الجمل لولد القاضي وقاله بره لبوك قول له حراثنا قتلوه خدم ولد السلطان...ولد القاضي قال لبوه شوي قال القاضي أنا والسلطان سوا سوا...جي القاضي ...قالتله مرته,أنت كيف حراثك يقتلوه وتقول أنا والسلطان سوا سوا...
والله كانك ماقتلتش اللي قتل حراثك ما عاد قاعدتلك..فيه. سيدنا القاضي لبس عمامته وركب حمارته وجي طوالي لخدم السلطان ..قال وين اللي قتل حراثنا...
قالو له ها هو ناض قتله..
السلطان قالتله السلطانه انت سلطان و تخلي القاضي حاكم فيك...مشى السلطان قتل القاضي و البلاد ولت حالته حاله و عمك شي بن شي مشي علي حاله
وجيت منهم وخليتهم وبوذني سمعتهم وبعيني ماريتهم